सावंतवाडी:
सावंतवाडी नगर परिषदेच्या सरकारी गोदामाजवळील परिसरात तब्बल १८ नवीन पथदीपांचा (स्ट्रीट लाईट) शुभारंभ नगराध्यक्षा सौ. श्रद्धा सावंत-भोसले यांच्या हस्ते करण्यात आला. या नवीन विद्युत व्यवस्थेमुळे हा संपूर्ण परिसर आता विजेच्या प्रकाशाने उजळून निघाला आहे.
व्यापारी आणि ग्राहकांना मोठा दिलासा
या पथदीपांचा सर्वाधिक फायदा मंगळवारी भरणाऱ्या आठवडा बाजारातील व्यापारी आणि ग्राहकांना होणार आहे. आठवडा बाजाराच्या मुख्य जागेसोबतच गोदामाच्या पाठीमागे असलेल्या मोकळ्या जागेतही हे दिवे बसवण्यात आले आहेत. एकूण १५ खांबांद्वारे (पोल) १८ पथदीप उभारण्यात आले असून, यामुळे रात्रीच्या वेळी या भागात होणारा अंधार दूर झाला आहे.
मान्यवरांची उपस्थिती
या लोकार्पण सोहळ्याप्रसंगी महिला व बालकल्याण सभापती दिपाली भालेकर, पाणीपुरवठा सभापती प्रतीक बांदेकर, उपसभापती सुनीता पेडणेकर, नगरसेविका सुकन्या टोपले यांच्यासह नगर परिषदेच्या विद्युत विभागाचे अधिकारी प्रदीप सावरवाडकर उपस्थित होते.
तसेच सुमीत कदम, रतन सुभेदार, प्रथम नाईक, कवयित्री कल्पना बांदेकर आणि स्थानिक नागरिक मोठ्या संख्येने उपस्थित होते. या परिसरातील अंधाराची समस्या दूर झाल्यामुळे नागरिकांनी समाधान व्यक्त केले आहे.
