‘जिंगल बेल्स’च्या सुरावटीत संस्कार नॅशनल स्कूल निरवडे येथे नाताळचा जल्लोष!
निरवडे: प्रतिनिधी
‘जिंगल बेल्स, जिंगल बेल्स’च्या सुरावटीत आणि बालचमूंच्या उत्साही नृत्याने संस्कार नॅशनल स्कूल, निरवडे येथे नाताळचा सण मोठ्या थाटामाटात साजरा करण्यात आला. यानिमित्ताने प्रशालेच्या आवारात आनंदाची उधळण पाहायला मिळाली.
आकर्षक सजावट आणि वेशभूषा
नाताळचे औचित्य साधून संपूर्ण शालेय परिसर अतिशय आकर्षकपणे सजवण्यात आला होता. ख्रिसमस ट्री, चांदण्या आणि रंगीबेरंगी दिव्यांमुळे शाळेला उत्सवी रूप प्राप्त झाले होते. यावेळी इयत्ता १ ली ते ४ थी च्या विद्यार्थ्यांनी सांताक्लॉज, मदर मेरी आणि परींची वेशभूषा साकारली होती, ज्याने सर्वांचे लक्ष वेधून घेतले.
सांताक्लॉजचे आगमन आणि खाऊवाटप
कार्यक्रमाचे मुख्य आकर्षण ठरले ते म्हणजे सांताक्लॉजचे आगमन. सांताने आपल्या झोळीतून चॉकलेट्स आणि गिफ्ट्सचे वाटप करताच मुलांच्या आनंदाला पारावार उरला नाही. चिमुकल्यांनी ‘जिंगल बेल्स’च्या तालावर ठेका धरत मनमोहक नृत्य सादर केले.
प्रभू येशूंच्या विचारांचे प्रबोधन
केवळ मनोरंजनच नव्हे, तर या सणाचे महत्त्वही विद्यार्थ्यांना समजावे या उद्देशाने इयत्ता १० वीची विद्यार्थिनी कु. एंजेल आग्नेल फर्नांडिस हिने प्रभू येशू ख्रिस्त यांच्या जीवनावर प्रकाश टाकला. तिने प्रभू येशूंचा जन्म, त्यांचे कार्य आणि त्यांनी जगाला दिलेला शांती व प्रेमाचा संदेश यावर आपले विचार व्यक्त केले.
कार्यक्रमाची सांगता
नृत्य, संगीत आणि मनोरंजनात्मक खेळांनंतर सर्व विद्यार्थ्यांना खाऊ आणि चॉकलेट वाटप करण्यात आले. ख्रिसमसच्या या जल्लोषाने विद्यार्थ्यांमध्ये उत्साहाचे वातावरण निर्माण झाले होते. प्रशालेचे शिक्षक आणि कर्मचारी वृंद यांच्या सहकार्याने हा सोहळा यशस्वीरित्या पार पडला.
