संस्कार नॅशनल स्कूल निरवडेमध्ये ‘ब्लू डे’ उत्साहात साजरा
निरवडे, प्रतिनिधी :
संस्कार नॅशनल स्कूल, निरवडे येथे ज्युनिअर केजी व सिनिअर केजीच्या विद्यार्थ्यांसाठी ‘ब्लू डे’ मोठ्या उत्साहात आणि आनंदी वातावरणात साजरा करण्यात आला. विद्यार्थ्यांना रंगांची ओळख करून देतानाच त्यांच्या सर्जनशीलतेला व आत्मविश्वासाला चालना देण्याच्या उद्देशाने या उपक्रमाचे आयोजन करण्यात आले.
यावेळी सर्व विद्यार्थी आकर्षक निळ्या रंगाच्या वेशभूषेत सहभागी झाले होते. शाळेतील वर्गखोल्या निळ्या रंगाच्या फुग्यांनी, फुलांनी आणि विविध सजावटीच्या वस्तूंनी आकर्षकपणे सजविण्यात आल्या होत्या. संपूर्ण परिसर निळ्या रंगाच्या आकर्षक सजावटीने खुलून दिसत होता.
उपक्रमादरम्यान विद्यार्थ्यांनी निळ्या रंगाच्या विविध वस्तू ओळखणे, कविता म्हणणे, गाणी सादर करणे, नृत्य, चित्रकला तसेच विविध मनोरंजक शैक्षणिक उपक्रमांमध्ये उत्स्फूर्त सहभाग घेतला. या माध्यमातून विद्यार्थ्यांना निळ्या रंगाची ओळख करून देण्याबरोबरच त्यांची निरीक्षणशक्ती, सर्जनशीलता आणि आत्मविश्वास वाढविण्यास मदत झाली.
यावेळी मुख्याध्यापक, शिक्षक व पालकांनी विद्यार्थ्यांचे कौतुक करत अशा शैक्षणिक आणि आनंददायी उपक्रमांमुळे बालकांच्या सर्वांगीण विकासाला चालना मिळते, असे सांगितले. आनंद, उत्साह आणि रंगतदार वातावरणात साजरा झालेला ‘ब्लू डे’ विद्यार्थ्यांसाठी अविस्मरणीय ठरला.
