रंगकलेचा सुवर्णस्पर्श अन् भक्तीचा लोकोत्सव: सिंधुदुर्गात गणेशमूर्तींच्या रंगकामाची धुम; मळगावच्या ज्ञानदेव उर्फ ताता गावडेंच्या कुंचल्यातून साकारतेय बाप्पाचे मनमोहक रूप!
विशेष प्रतिनिधी | सिंधुदुर्ग
कोकणी माणसाच्या मनावर अधिराज्य गाजवणारा आणि भक्ती-आनंदाचा वर्षाव करणारा ‘लोकोत्सव’ म्हणजेच गणेशोत्सव! बाप्पाच्या आगमनाला अवघे १४दिवस उरल्याने निसर्गरम्य कोकणात आतापासूनच मांगल्याचे आणि उत्साहाचे वारे वाहू लागले आहेत. चाकरमान्यांचे पाय आपोआप आपल्या मूळ गावाकडे वळू लागले आहेत, तर दुसरीकडे सिंधुदुर्गातील गणेश मूर्तीशाळांमध्ये चैतन्याला उधाण आले आहे. लाडक्या बाप्पाला रेखीव, लोभस आणि सजीव रूप देण्यासाठी जिल्ह्यातील मूर्तिकार सध्या अहोरात्र मेहनत घेत आहेत.
कुंचल्याची जादू अन् रात्रंदिवस मेहनत
मूर्ती घडवण्याचा टप्पा पूर्ण झाल्यानंतर आता चित्रशाळांमध्ये अंतिम रंगकामाची धावपळ सुरू आहे. बाप्पाच्या चेहऱ्यावरील सात्त्विक भाव, नेत्रकमळ (डोळे) आखणी, पीतांबराची झालर आणि दागिन्यांवर सोन्या-चांदीची चमक आणण्याचे काम अत्यंत तन्मयतेने केले जात आहे. एकाग्रता आणि निष्ठेचा हा अनोखा संगम दरवर्षी कोकणातील मूर्तीशाळांमध्ये पाहायला मिळतो. गणेशभक्तांना वेळेत मूर्ती सुपूर्द करण्यासाठी अनेक कलाकार आपली तहान-भूक विसरून रात्रीच्या लखलखत्या दिव्यांमध्ये कुंचल्याने रंग भरण्यात तल्लीन झाले आहेत.
सावंतवाडी तालुक्यातील मळगाव हे मूर्तीकलेसाठी विशेष ओळखले जाते. नामांकित मूर्तिकार ज्ञानदेव उर्फ ताता गावडे यांच्या गणेश मूर्ती शाळेत सध्या कामाचा वेग प्रचंड वाढला आहे. ज्ञानदेव उर्फ ताता गावडे यांच्या कलाकुसरीतून साकारणाऱ्या मूर्तींचे तेज आणि त्यांमधील भाव पूर्ण महाराष्ट्रातील भक्तांचे लक्ष वेधून घेतात. सध्या ताता गावडे आणि त्यांचे सहकारी मूर्तींवर शेवटचा सुबक हात फिरवत असून, प्रत्येक मूर्तीमध्ये जणू प्राण फुंकले जात आहेत. त्यांच्या या मूर्तीशाळेत दिवस-रात्र कलाकारांचा कुंचला चालताना दिसत आहे.
मांगल्य अन् उत्साहाने कोकण न्हाऊन निघाले
मूर्तीशाळांमधील या लगबगीमुळे सावंतवाडीसह संपूर्ण सिंधुदुर्ग जिल्ह्यात गणेशोत्सवाचा श्रीगणेशा झाला आहे. बाजारपेठा सजू लागल्या असून, घराघरांत बाप्पाच्या स्वागताची आहे. लाडक्या विघ्नहर्त्याचे स्वागत करण्यासाठी आणि ढोल-ताशांच्या गजरात बाप्पाला घरी आणण्यासाठी संपूर्ण कोकण आता आतुरतेने वाट पाहत आहे.
