सिंधुदुर्ग-रत्नागिरी जिल्हा परिषद निवडणूक: सरासरी ६०% मतदान; निकालाची प्रतीक्षा
सिंधुदुर्गनगरी/रत्नागिरी:
कोकणातील राजकीयदृष्ट्या अत्यंत महत्त्वाच्या असलेल्या सिंधुदुर्ग आणि रत्नागिरी जिल्ह्यांत जिल्हा परिषद आणि पंचायत समितीसाठी शनिवारी मतदान प्रक्रिया पार पडली. दोन्ही जिल्ह्यांत मतदारांनी मध्यम प्रतिसाद दिला असून, सरासरी ६० टक्के मतदान झाल्याचा प्राथमिक अंदाज वर्तवण्यात आला आहे. या निवडणुकीचा निकाल सोमवार, ९ फेब्रुवारी रोजी जाहीर होणार असून संपूर्ण कोकणाचे लक्ष या निकालाकडे लागले आहे.
सिंधुदुर्ग जिल्हा: ३५९ उमेदवारांचे भवितव्य सीलबंद
सिंधुदुर्ग जिल्हा परिषदेच्या ५० आणि पंचायत समितीच्या १०० जागांसाठी मतदान झाले. जिल्ह्यातील १२५ जागांवर आपले नशीब आजमावणाऱ्या ३५९ उमेदवारांचे राजकीय भवितव्य आता मतदान यंत्रांत बंद झाले आहे. विशेष म्हणजे, मतदानापूर्वीच जिल्हा परिषदेच्या ८ आणि पंचायत समितीच्या १७ जागा बिनविरोध झाल्या आहेत.
सिंधुदुर्गातील तालुकानिहाय मतदानाची टक्केवारी:
- वेंगुर्ला: ६९.०३ टक्के (सर्वाधिक)
- सावंतवाडी: ६७.४५ टक्के
- कणकवली: ५९.८४ टक्के
- दोडामार्ग: ५९.८३ टक्के
- मालवण: ५८.९० टक्के
- देवगड: ५७.०० टक्के
- वैभववाडी: ५४.७९ टक्के
- कुडाळ: ५४.०० टक्के (सर्वात कमी)
रत्नागिरी जिल्हा: यंत्रांच्या बिघाडामुळे मतदारांचा खोळंबा
रत्नागिरी जिल्ह्यात मतदानाला तांत्रिक बिघाडाचे गालबोट लागले. चिपळूण, खेड, दापोली, लांजा आणि राजापूर या तालुक्यांमध्ये मतदान यंत्रे बंद पडल्याने प्रशासनाची मोठी धावपळ उडाली. एकट्या चिपळूण तालुक्यात ५० केंद्रांवर, तर लांज्यात १२ केंद्रांवर यंत्रे नादुरुस्त झाल्याने मतदारांना तासनतास रांगेत उभे राहावे लागले.
दुपारी साडेतीन वाजेपर्यंत जिल्ह्यात ४७.३८ टक्के मतदान झाले होते, जे अंतिम आकडेवारीनुसार ६० ते ६५ टक्क्यांच्या आसपास जाण्याची शक्यता आहे.
कोकणचा ‘किंग’ कोण?
या निवडणुकीत सत्ताधारी महायुती आणि महाविकास आघाडी यांच्यात अटीतटीची लढत पाहायला मिळत आहे. दोन्ही बाजूंच्या दिग्गज नेत्यांची प्रतिष्ठा पणाला लागली असून, सोमवारी होणाऱ्या मतमोजणीनंतरच खऱ्या अर्थाने जिल्ह्याचा ‘किंग’ कोण ठरणार हे स्पष्ट होईल.
