माणुसकीचे दर्शन: सर्पदंश झालेल्या बालिकेसाठी दांपत्य धावून आले; तळवडे व्यापारी मंडळाकडून विशेष सत्कार

तळवडे:
साप चावून गंभीर प्रकृती झालेल्या कु. प्रगती सखाराम भैरे या बालिकेसाठी देवदूत बनून धावून जाणाऱ्या प्रशांत निरवडेकर आणि त्यांच्या पत्नीचे सर्वत्र कौतुक होत आहे. या दांपत्याच्या तत्परतेमुळे आणि सेवेमुळे प्रगतीचे प्राण वाचले असून, त्यांच्या या कार्याची दखल घेत तळवडे व्यापारी मंडळाच्या वतीने त्यांचा गौरव करण्यात आला.
नेमकी घटना काय?
मिळालेल्या माहितीनुसार, कु. प्रगती सखाराम भैरे हिला ‘फुरसे’ या विषारी सापाने दंश केला होता. याच दरम्यान श्री. प्रशांत रमेश निरवडेकर हे अनपेक्षितपणे तिच्या घरी गेले असता, प्रगतीला साप चावल्याचे त्यांना समजले. परिस्थितीचे गांभीर्य ओळखून त्यांनी क्षणाचाही विलंब न लावता तिला तात्काळ निरवडे येथील सरकारी दवाखान्यात दाखल केले.
दिवस-रात्र सेवा आणि उपचार
निरवडे येथे प्राथमिक उपचार सुरू झाले, मात्र प्रगतीला होणारा त्रास वाढत गेल्याने तिला अधिक उपचारांसाठी सावंतवाडी येथे हलवण्यात आले. यावेळी प्रशांत निरवडेकर आणि त्यांच्या पत्नी सौ. प्रिया प्रशांत निरवडेकर या दोघांनीही माणुसकीचे नाते जपत तीन दिवस आणि दोन रात्री रुग्णालयात थांबून प्रगतीची सुश्रूषा केली. त्यांच्या या प्रयत्नांना यश आले असून प्रगती आता पूर्णपणे बरी होऊन घरी परतली आहे.
व्यापारी मंडळाकडून सत्कार
एका बालिकेचे प्राण वाचवण्यासाठी स्वतःचे काम बाजूला ठेवून धावून जाणाऱ्या निरवडेकर दांपत्याच्या या धाडसाचे आणि सेवाभावी वृत्तीचे कौतुक करण्यासाठी  तळवडे व्यापारी मंडळाच्या वतीने एका कार्यक्रमाचे आयोजन करण्यात आले होते. यावेळी निरवडेकर दांपत्याचा जाहीर सत्कार करून त्यांच्या कार्याचा गौरव करण्यात आला.
यावेळी उपस्थित मान्यवरांनी बोलताना सांगितले की, “आजच्या काळात जिथे लोक मदतीसाठी पुढे येत नाहीत, तिथे निरवडेकर दांपत्याने दाखवलेली तत्परता समाजासाठी प्रेरणादायी आहे.”