सावंतवाडी, दि. १६ :
शिवसेना जिल्हाप्रमुख, सावंतवाडी नगरपरिषदेचे माजी नगराध्यक्ष तथा विद्यमान नगरसेवक संजू परब यांच्या वाढदिवसानिमित्त सावंतवाडी, वेंगुर्ला आणि दोडामार्ग या तीन तालुक्यांत विविध सामाजिक व लोकोपयोगी उपक्रमांचे आयोजन करण्यात आले आहे. तब्बल ५ हजार वृक्षांचे वाटप, रक्तदान शिबिर, रुग्णालयांना पंखे, विद्यार्थ्यांना वह्या-पुस्तके तसेच गरजूंना छत्री वाटप अशा उपक्रमांद्वारे वाढदिवस साजरा करण्यात येणार असल्याची माहिती शिवसेना तालुकाप्रमुख दिनेश गावडे व महिला जिल्हाप्रमुख ॲड. निता सावंत-कविटकर यांनी पत्रकार परिषदेत दिली.
संजू परब यांचा वाढदिवस १९ ऑगस्ट रोजी विविध सामाजिक उपक्रमांनी उत्साहात साजरा केला जाणार आहे. त्याअनुषंगाने १८ ऑगस्ट रोजी नगरसेवक देव्या सूर्याजी मित्रमंडळ, युवा रक्तदाता संघटना आणि शिवसेनेच्या वतीने रक्तदान शिबिराचे आयोजन करण्यात आले आहे.
पर्यावरण संवर्धनाचा संदेश देत सावंतवाडी, वेंगुर्ला आणि दोडामार्ग या तीनही तालुक्यांमध्ये सुमारे ५ हजार वृक्षांचे वाटप करण्यात येणार आहे. तसेच तीनही तालुक्यांतील रुग्णालयांमध्ये रुग्णांच्या सुविधेसाठी पंखे वाटप केले जाणार असून, लाखे वस्तीमध्ये यापूर्वीच पंखे वाटप करण्यात आले आहे.
विद्यार्थ्यांच्या शैक्षणिक गरजा लक्षात घेऊन सावंतवाडीतील जिल्हा परिषद प्राथमिक शाळांमधील विद्यार्थ्यांना वह्या, शिष्यवृत्तीधारक विद्यार्थ्यांना पुस्तके, तर गरजू नागरिकांना छत्र्यांचे वाटप करण्यात येणार आहे.
समाजातील विविध घटकांना मदतीचा हात देत रोणापाल येथील निराधार मुलांच्या छात्रालयातील विद्यार्थ्यांना खाऊ वाटप करून केक कापण्यात येणार आहे. कोंडूरा येथील विशेष शाळेत फळवाटप, आरोंदा येथील शाळांमध्ये विद्यार्थ्यांना वह्यांचे वाटप, तर सावंतवाडी नगरपालिका सफाई कर्मचाऱ्यांना धान्याचे वाटप करण्यात येणार आहे.
गोविंद चित्रमंदिरात १९ ऑगस्टला मुख्य सोहळा
दरम्यान, १९ ऑगस्ट रोजी सकाळी १०.३० वाजता गोविंद चित्रमंदिर, सावंतवाडी येथे संजू परब यांचा मुख्य वाढदिवस सोहळा केक कापून साजरा केला जाणार आहे. या कार्यक्रमाला सावंतवाडी मतदारसंघाचे आमदार दीपक केसरकर तसेच कुडाळ-मालवण मतदारसंघाचे आमदार निलेश राणे यांची प्रमुख उपस्थिती राहणार आहे.
“केवळ औपचारिक शुभेच्छा न घेता समाजोपयोगी उपक्रमांच्या माध्यमातून सामाजिक बांधिलकी जपणे हा या वाढदिवसामागील मुख्य उद्देश आहे,” असे ॲड. निता सावंत-कविटकर यांनी स्पष्ट केले.
यावेळी तालुकाप्रमुख दिनेश गावडे, सभापती सुस्मिता जाधव, जिल्हा परिषद सदस्य सुधा कवठणकर, माजी सभापती अशोक दळवी, शहरप्रमुख बाबू कुडतरकर, दोडामार्ग तालुकाप्रमुख गणेशप्रसाद गवस, उपजिल्हाप्रमुख झेवियर फर्नांडिस, सचिव परिक्षीत मांजरेकर, पंचायत समिती सदस्य शरद धाऊसकर, प्रणाली टिळवे, नगरसेविका शर्वरी धारगळकर, स्नेहा नाईक, महिला शहरप्रमुख भारती मोरे, राजन रेडकर, नगरसेवक देव्या सूर्याजी, विनोद नाईक, क्लेटस फर्नांडिस, सचिन साटेलकर, विजय टिळवे यांच्यासह शिवसेना पदाधिकारी व कार्यकर्ते मोठ्या संख्येने उपस्थित होते.
